mannaudssjodurinn-hekla-rvxa8d6rp-v1

Grundarfjarðarbæ veitt viðurkenning

Thu, 29 Oct 2026 14:38:35 GMT

Grundarfjarðarbær fær viðurkenningu fyrir góðan árangur í Sveitarfélagi ársins 2026

Grundarfjarðarbær hlaut viðurkenningu fyrir góðan árangur í könnuninni, Sveitarfélag ársins 2026 og raðaðist í 3. sæti yfir blómlegustu sveitarfélög landsins. Könnunin sem nú var framkvæmd í fimmta sinn, er ætlað að varpa ljósi á starfsumhverfi og stjórnun á vinnustöðum sveitarfélaga, hvetja til umbóta og veita þeim viðurkenningu sem standa sig vel í að hlúa að starfsfólki sínu.

Þar sem fulltrúi Grundarfjarðarbæjar komst ekki á uppskeruhátíð verkefnisins, 15. október, afhenti fulltrúi Mannauðsseturs og sjóðs Heklu, Þóra Sonja Helgadóttir, bæjarstjóranum, Birki Jóni Jónssyni og starfsfólki Grundarfjarðarbæjar verðlaunin á heimavelli þeirra í Grundarfirði. Mannauðssetur og sjóður Heklu færir þeim innilegar hamingjuóskir með þennan góða árangur.

Þóra Sonja Helgadóttir, verkefnastjóri hjá Kili stéttarfélagi, Birkir Jón Jónsson, bæjarstjóri Grundarfjarðarbæjar, Hinrik Konráðsson, íþrótta- og tómstundafulltrúi, Sigurður Gísli Guðjónsson, skólastjóri grunnskólans, Pálmi Jóhannsson, forstöðumaður menningar og markaðsmála, Nanna Vilborg Harðardóttir, verkefnastjóri skipulags- og umhverfismála, Guðmundur Rúnar Svansson, þjónustufulltrúi skipulags- og byggingarmála, Heiðdís Lind Kristinsdóttir, leikskólastjóri, Sigurlaug R. Sævarsdóttir, skrifstofustjóri, Helga Sjöfn Ólafsdóttir, þjónustufulltrúi, Sigríður Gísladóttir, launa- og innheimtufulltrúi, Guðrún Margrét Hjaltadóttir, aðalbókari, Olga Sædís Aðalsteinsdóttir, starfsmaður bókasafns og Örvar Þór Örlygsson, verkefnastjóri tæknimála og framkvæmda.

Fjögur sveitarfélög hlutu viðurkenningu fyrir framúrskarandi árangur í könnuninni Sveitarfélag ársins 2026. Þau eru:

Hrunamannahreppur
Grímsnes- og Grafningshreppur
Grundarfjarðarbær
Skeiða- og Gnúpverjahreppur

Frekari upplýsingar um verkefnið Sveitarfélag ársins og myndir frá uppskeruhátíðinni 2026 er að finna á heimasíðu verkefnisins sveitarfelagarsins.is

Sveitarfélag ársins 2026 niðurstöður

Fri, 23 Oct 2026 12:48:49 GMT

Sveitarfélag ársins 2026

Niðurstöður viðhorfskönnunarinnar Sveitarfélag ársins 2026 voru kynntar á uppskeruhátíð verkefnisins 15. október. Þar voru blómlegum sveitarfélögum sem vermdu efstu fjögur sætin í starfsánægju og góðu starfsumhverfi, veittar viðurkenningar fyrir þeirra góðu störf.

Könnunin, sem nú var framkvæmd í fimmta sinn, sýnir að starfsfólk sveitarfélaga er almennt ánægt með starfsumhverfi sitt og að ánægja með launakjör, sveigjanleika og jafnrétti hefur aukist undanfarin fimm ár.

Fjögur sveitarfélög hlutu viðurkenningu fyrir framúrskarandi árangur í könnuninni. Þau eru:

Hrunamannahreppur
Grímsnes- og Grafningshreppur
Grundarfjarðarbær
Skeiða- og Gnúpverjahreppur

Sveitarfélögin á Suðurlandi sem hlutu viðurkenningu hafa verið á meðal þeirra efstu í könnuninni undanfarin ár. Hrunamannahreppur hefur áður verið í hópi efstu sveitarfélaga og Grímsnes- og Grafningshreppur hlaut fyrsta sætið þegar könnunin var fyrst framkvæmd árið 2022.

Mynd: Fjóla St. Kristinsdóttir, sveitarstjóri Grímsnes- og Grafningshrepps, Aldís Hafsteinsdóttir, sveitarstjóri Hrunamannahrepps og Sylvía Karen Heimisdóttir, sveitarstjóri Skeiða- og Gnúpverjahrepps. Á myndina vantar fulltrúa Grundarfjarðarbæjar sem sá sér ekki fært um að mæta.

Ánægja með starfsumhverfið hefur aukist

Könnunin Sveitarfélag ársins hefur verið framkvæmd árlega frá árinu 2022 og er ein af stærri vinnumarkaðskönnunum hér á landi. Henni er ætlað að varpa ljósi á starfsumhverfi og stjórnun á vinnustöðum sveitarfélaga, hvetja til umbóta og veita þeim vinnustöðum viðurkenningu sem standa sig vel í að hlúa að starfsfólki sínu.

Niðurstöður ársins sýna að starfsfólk sveitarfélaga er almennt ánægt í störfum sínum. Þá hefur ánægja með launakjör, sveigjanleika og jafnrétti aukist á þeim fimm árum sem könnunin hefur verið framkvæmd.

Nokkur munur kemur þó fram á upplifun starfsfólks eftir kyni, störfum og starfssviðum. Karlar eru almennt ánægðari en konur með starfsumhverfi og stjórnun og stjórnendur ánægðastir þegar niðurstöður eru skoðaðar eftir starfsstéttum.

Lægstu einkunnirnar koma frá starfsfólki í framreiðslustörfum, meðal annars matráðum og aðstoðarfólki í eldhúsum. Þegar niðurstöður eru skoðaðar eftir starfsemi sveitarfélaga gefur starfsfólk stjórnsýslu hæstu einkunnir fyrir alla þætti könnunarinnar en starfsfólk í félags- og velferðarþjónustu þær lægstu.

Niðurstöðurnar sýna því að þótt starfsánægja sé almennt mikil er áfram mikilvægt að huga að ólíkum starfsaðstæðum og tækifærum starfsfólks til umbóta.

Sí- og endurmenntun verður sífellt mikilvægari

Á uppskeruhátíðinni kynnti Tómas Bjarnason, sviðsstjóri stjórnenda- og vinnustaðaráðgjafar Gallup, helstu niðurstöður könnunarinnar. Þar var meðal annars fjallað um mikilvægi fræðslu og sí- og endurmenntunar í ljósi breytinga á vinnumarkaði.

Nærri helmingur svarenda segist fá mikla hvatningu frá stjórnendum sínum til að sækja fræðslu og sí- og endurmenntun. Hlutfallið hefur aukist jafnt og þétt frá árinu 2022. Þá sýna niðurstöðurnar að starfsmannasjóðir gegna mikilvægu hlutverki við að hvetja starfsfólk til að sækja sér aukna menntun og fræðslu.

Tómas benti á að mörg störf væru að taka miklum breytingum vegna tækniframfara, meðal annars með tilkomu gervigreindar. Því væri mikilvægara en nokkru sinni fyrr að starfsfólk hefði tækifæri til að efla þekkingu sína og færni til að takast á við breyttar starfskröfur.

Niðurstöðurnar sýna að háskólamenntað starfsfólk sækir frekar sí- og endurmenntun en þau sem ekki hafa háskólamenntun. Því sé sérstaklega mikilvægt að stjórnendur hvetji allt starfsfólk til þátttöku í fræðslu, óháð menntun og störfum.

Árið 2026 var þemað í könnuninni andleg líðan og streita en árlega er ákveðið að beina sjónum að ákveðnu þema ásamt grunnspurningum varðandi starfsumhverfi. 45,4% svarenda finna frekar oft eða mjög oft fyrir streitu í starfi og einungis 26% svarenenda segjast sjaldan eða aldrei finna fyrir streitu. Áhugavert væri að kafa dýpra ofan í það hverjir streituvaldarnir eru í starfi þessa fólks og hvað er til ráða.

Mikilvægt tæki til að bæta starfsumhverfið

Könnunin Sveitarfélag ársins er samstarfsverkefni 11 bæjarstarfsmannafélaga innan BSRB og Gallup. Þessi ellefu félög eru Starfsmannafélag Mosfellsbæjar, Starfsmannafélag Vestmannaeyja, Starfsmannafélag Garðabæjar, Starfsmannafélag Suðurnesja, Starfsmannafélag Kópavogs, Starfsmannafélag Hafnarfjarðar, Starfsmannafélag Húsavíkur, Kjölur, FOSS, FOSA og Sameyki utan Reykjavíkur.

Könnunin var lögð fyrir um 10.000 félagsfólk sem aðild á að stéttarfélögunum. Á hverju ári er sveitarfélögum einnig boðið að taka þátt fyrir allt sitt starfsfólk og þáðu ellefu sveitarfélög það boð þetta árið. Við hvetjum sveitarfélög að nýta sér þessa greinargóðu könnun til innra mats á starfsumhverfi síns fólks og taka þátt á næsta ári þegar þau fá boð um það frá Mannauðssetri og sjóði Heklu.

Með könnuninni fá sveitarfélögin mikilvægar upplýsingar um stöðu starfsumhverfis og stjórnunar á sínum vinnustöðum og tækifæri til að bera niðurstöðurnar saman við önnur sveitarfélög. Sjá einnig frétt/ fjölpóst

Heimasíða Sveitarfélags ársins

Við erum einnig á Facebook

Uppskeruhátíð - Sveitarfélag ársins 2026

Thu, 08 Oct 2026 13:53:04 GMT

Uppskeruhátíð Sveitarfélags ársins 2026 - Hótel Selfoss

15. október kl. 14:00-15:00

Verið öll velkomin að mæta eða horfa á í streymi á heimasíðu Mannauðssjóðs Heklu.

Fimmta árið í röð útnefnum við „Sveitarfélag ársins“ á grundvelli undangenginnar könnunar. Svarendum fjölgar ár frá ári og hafa aldrei verið fleiri en nú.

Tilgangurinn með könnuninni er að hvetja stjórnendur sveitarfélaganna til að veita starfsumhverfinu meiri athygli, sem og að ráðast í umbótaverkefni þar sem þess er þörf. Einnig er ætlunin að niðurstöðurnar skapi almenna umræðu um starfsumhverfi og stjórnun á vinnustöðum, félagsfólki stéttarfélaganna til hagsbóta. Þá er tilgangurinn ekki síst að veita góðum vinnustöðum viðurkenningu fyrir að hlúa vel að starfsfólki. Könnunin veitir mikilvægar upplýsingar um starfsumhverfi og stjórnun. Mælingin nær yfir fjölbreytta þætti en þannig fæst heilsteypt mynd af innra starfsumhverfi sveitarfélaganna.

Mannauðssetrið Hekla hefur meðal annars það hlutverk að rýna í gögnin og bregðast við ef mögulegt er. Eitt af því sem nú þegar hefur verið gert er að benda á þá staðreynd að allt of fáir eða undir 50% starfsfólks er boðið í starfsmannasamtal af yfirmanni. Mannauðssetrið hefur brugðist við þessu með því að bjóða upp á námskeið félagsfólki að kostnaðarlausu. Eins er verið að vinna að stafrænum námskeiðum á sviði uppeldismála og í málaflokki fatlaðra sem svar við beiðni um meira framboð af aðgengilegu starfsþróunarnámsefni.

Sveitarfélögum er boðið að taka þátt í könnuninni Sveitarfélag ársins fyrir hönd alls starfsfólks og það er gleðilegt að sú þátttaka hefur aukist ár frá ári. Í ár tóku ellefu sveitarfélög þátt fyrir utan alla félagsmenn bæjarstarfsmannafélaganna. Könnunin er ein af stærri vinnumarkaðskönnunum sem framkvæmd er hér á landi og vonast er til að sífellt fleiri sveitarfélög bætist á vagninn á næstu árum og taki þátt fyrir allt sitt starfsfólk.

Uppskeruhátíðin 15. októberber kl. 14:00-15:00 - sjá frétt

Dagskrá:

14:00 – Hrund Hlöðversdóttir framkvæmdastjóri Mannauðssjóðsins Heklu opnar hátíðina og býður fólk velkomið.

14:03 – Tónlistaratriði frá Tónlistarskóla Árnesinga.

14:10 – Tómas Bjarnason sviðsstjóri stjórnenda- og vinnustaðaráðgjafar Gallup kynnir helstu niðurstöður könnunarinnar um Sveitarfélag ársins 2026.

14:30 – Guðrún Rakel Eiríksdóttir, klínískur sálfræðingur og doktorsnemi við Háskólann í Reykjavík flytur erindið: Andleg líðan í vinnu – hvað geta vinnustaðir gert? Þar fjallar hún um álag, stuðning og aðstæður sem skipta máli í því samhengi. Í erindinu talar hún m.a. út frá niðurstöðum könnunarinnar.

14:50 - Verðlaun afhend þeim fjórum sveitarfélögum sem verma efstu sæti. Árný Erla Bjarnadóttir formaður FOSS stéttarfélags í almannaþjónustu og Hrund sjá um að veita verðlaunin.

15:00 –hátíðinni lýkur formlega.

Nýjar úthlutunarreglur í Mannauðssjóði Heklu

Thu, 24 Sep 2026 13:52:54 GMT

Er komið að starfsþróun / endurmenntun þíns starfsmannahóps?

Kynntu þér nýjar úthlutunarreglur Mannauðssjóðsins Heklu sjá hér

Hægt er að sækja um starfsþróunarstyrki til Mannauðssjóðs Heklu fyrir það starfsfólk sem greiðir í þau stéttarfélög sem tilheyra sjóðnum. sjá hér

Nýjar úthlutunarreglur er að finna á heimasíðu sjóðsins .

Athugið að:

Sækja tímanlega um áður en fræðsla eða námsferð fer fram. Á heimasíðunni er hægt að fylgjast með næstu úthlutunarfundum sjóðsstjórnar.

Gæta að tímamörkum á milli styrkveitinga t.d. náms- og kynnisferða en hægt er að sækja um styrk vegna námsferðar erlendis á fjögurra ára fresti en á tveggja ára fresti um styrk til námsferðar innanlands.

Athugið að Mannauðssjóðurinn Hekla er stofnanasjóður og ekki er tekið á móti kvittunum einstaklinga. Sveitarfélög greiða kostnað eftir að styrkloforð er fengið og sveitarfélögin fá styrkinn greiddan eftir að námskeiði/fræðslu lýkur.

Sömu eða svipaðar reglur gilda í öðrum sjóðum til að mynda í Sveitamennt.

Kynntu þér vel úthlutunarreglur áður en sótt er um eða hafðu samband við framkvæmdastjóra í gegnum síma 525 8319 eða með netpósti hrund@mannaudssjodur.is.

Sjá frétt

Starfsmannasamtöl - niðurstöður úr könnun um Sveitarfélag ársins 2026

Tue, 15 Sep 2026 14:08:13 GMT

Nær 50% starfsmanna sveitarfélaganna fá ekki starfsmannasamtal við sinn yfirmann

Mikill munur er milli starfsstöðva sveitarfélaga á því hvort starfsmenn fái samtal með formlegum hætti við sinn yfirmann. Þetta má glögglega sjá í nýjustu niðurstöðum úr könnuninni Sveitarfélag ársins sem Mannauðssetur og sjóður Heklu leggur fyrir bæjarstarfsmenn með aðstoð Gallup. Þar eru grunnskólar sveitarfélaganna að standa sig best en fæstir starfsmenn sem eru í gæslu- öryggis- og eftirlitsstörfum fá samtal við sinn yfirmann. Sterk tengsl eru á milli betri líðan á vinnustað og þess að fá reglulega formlegt samtal við yfirmann. 15. október klukkan 14:00 verður farið yfir allar niðurstöður könnunarinnar á streymi á vefsíðu Mannauðssjóðs Heklu

Mannauðssetur og sjóður Heklu bjóða félagsfólki upp á námskeið um starfsmannasamtöl þeim að kostnaðarlausu.

Sjá frétt

Sveitarfélag ársins 2026

Wed, 08 Apr 2026 09:27:50 GMT

Könnunin Sveitarfélag ársins 2026 - Vertu með!

Fréttapóstur um könnunina Sveitarfélag ársins - mars 2026

Fréttabréf Mannauðssjóðsins

Thu, 19 Feb 2026 15:09:45 GMT

Hér má finna fréttabréf Mannauðssjóðs Heklu

Desember

Fri, 19 Dec 2025 10:27:12 GMT

Fréttir í desember

Hér er að finna fréttabréf desembermánaðar frá Mannauðssjóði Heklu.

Við óskum ykkur gleðilegra jóla og farsældar á nýju ári.

Góðar umræður á landsfundi bæjarstarfsmannafélaga BSRB

Thu, 27 Nov 2025 15:06:20 GMT

Góðar umræður og vörður fyrir næstu skref Mannauðssjóðs Heklu

Á landsfundi bæjarstarfsmannafélaga BSRB 19.-21. nóvember var Mannauðssjóðurinn Hekla kynntur ásamt Mannauðssetri Heklu og verkefninu Sveitarfélag ársins sem er könnun meðal félaga bæjarstarfsmannafélaganna. Góðar umræður sköpuðust í kjölfarið og hér má finna samantekt . Góðar umræður á landsfundinum.

Mannauðssjóðurinn Hekla og Starfsmennt gera með sér samstarfssamning

Fri, 07 Nov 2025 11:34:57 GMT

Nýr samstarfssamningur Heklunnar við Fræðslusetur Starfsmennt

Á dögunum skrifuðu Hrund Hlöðversdóttir, framkvæmdastjóri Mannauðssjóðs Heklu og Guðfinna Harðardóttir, framkvæmdastjóri Fræðsluseturs Starfsmenntar undir samstarfssamning. Nýi samningurinn tekur við af samningi frá árinu 2008 sem var þá gerður við fyrri mannauðssjóði. Mannauðssjóðurinn Hekla hefur það hlutverk að veita styrki til fræðsluverkefna á vegum sveitarfélaga og stofnana þeirra með það að leiðarljósi að stuðla að framgangi starfsfólks og framþróun með markvissri starfsþróun. Samhliða sjóðnum rekur Hekla Mannauðssetur sem hefur það hlutverk að vinna að fræðslutækifærum og miðlun þeirra. Mannauðssetur leggur áherslu á samvinnu við tengda fræðsluaðila.

Fræðslusetrið Starfsmennt var stofnað árið 2001 og er samstarfsvettvangur fjármála- og efnahagsráðuneytis og flestra aðildarfélaga BSRB um starfstengt nám, starfsþróun og ráðgjöf á sviði mannauðseflingar.

mannaudssjodurinn-hekla-rvxa8d6rp-v1

Grundarfjarðarbæ veitt viðurkenning

Grundarfjarðarbær fær viðurkenningu fyrir góðan árangur í Sveitarfélagi ársins 2026

Sveitarfélag ársins 2026 niðurstöður

Sveitarfélag ársins 2026

Uppskeruhátíð - Sveitarfélag ársins 2026

Uppskeruhátíð Sveitarfélags ársins 2026 - Hótel Selfoss

15. október kl. 14:00-15:00

Verið öll velkomin að mæta eða horfa á í streymi á heimasíðu Mannauðssjóðs Heklu.

﻿

Nýjar úthlutunarreglur í Mannauðssjóði Heklu

Er komið að starfsþróun / endurmenntun þíns starfsmannahóps?

Kynntu þér nýjar úthlutunarreglur Mannauðssjóðsins Heklu sjá hér

Starfsmannasamtöl - niðurstöður úr könnun um Sveitarfélag ársins 2026

Nær 50% starfsmanna sveitarfélaganna fá ekki starfsmannasamtal við sinn yfirmann

Sveitarfélag ársins 2026

Könnunin Sveitarfélag ársins 2026 - Vertu með!

Fréttabréf Mannauðssjóðsins

Desember

Fréttir í desember

Góðar umræður á landsfundi bæjarstarfsmannafélaga BSRB

Góðar umræður og vörður fyrir næstu skref Mannauðssjóðs Heklu

Mannauðssjóðurinn Hekla og Starfsmennt gera með sér samstarfssamning

Nýr samstarfssamningur Heklunnar við Fræðslusetur Starfsmennt